រសៀលនេះ វិសាខា ត្រូវការឈ្នះ Saitama ដើម្បីឡើងវគ្គពាក់កណ្តាលផ្តាច់ព្រ័ត្រ
ក្លិបបាល់ទះ វិសាខា ត្រូវការឈ្នះដាច់ខាតលើក្រុមមកពីប្រទេសជប៉ុន Saitama Azalea ដើម្បីទទួលបានកៅអីឡើងទៅវគ្គពាក់កណ្តាលផ្តាច់ព្រ័ត្រពានរង្វាន់ពានរង្វាន់ Win+SteakVolleyball Invitation (WSVI) បន្ទាប់ពីចាញ់ក្រុមម្ចាស់ផ្ទះ Win Streak ទាំងប្រផុតប្រផើយកាលពីយប់មិញ។
ការប្រកួតសន្សំពិន្ទុលើកទី២ វិសាខា បានចាញ់ពិន្ទុ Win Streak ទាំងតឹងតែងបំផុតដោយប្រើពេលយ៉ាងយូររហូតដល់៥សិត គឺលទ្ធផល ២-៣។ សិតទី១ Win Streak ឈ្នះដោយពិន្ទុ ២២-២៥, សិតទី២ វិសាខា ឈ្នះដោយពិន្ទុ ២៥-២២, សិតទី៣ Win Streak ឈ្នះ១៩-២៥, សិតទី៤ វិសាខា ឈ្នះដោយពិន្ទុ ២៧-២៥ និងសិតកាត់សេចក្តីទី៥ Win Streak ឈ្នះដោយពិន្ទុ ១៣-១៥។
កាលពីការប្រកួតសន្សំពិន្ទុទី១ វិសាខា បានយកឈ្នះក្រុមអូស្ត្រាលី Volleyball Academy ដោយលទ្ធផល ៣-០ (២៦-២៤, ២៥-២៣ និង ២៥-១៨) ខណៈ Win Streak បានយកឈ្នះក្រុមជប៉ុន Saitama Azalea ដោយលទ្ធផល ៣-០ (២៥-២១, ២៥-២២ និង ២៥-១៩)។
ពេលនេះ Win Streak កំពុងឈរលើកំពូលតារាងពូល B ហើយ វិសាខា ឈរលេខ២ ក្រុមជប៉ុន Saitama Azalea លេខ៣ និងលេខ៤ក្រុមអូស្ត្រាលី Volleyball Academy ។ សម្រាប់ការប្រកួតសន្សំពិន្ទុចុងក្រោយនារសៀលថ្ងៃនេះ វិសាខាត្រូវការឈ្នះដាច់ខាតដើម្បីបន្តឈរលេខ២ក្នុងពូលបានឡើងទៅកាន់វគ្គពាក់កណ្តាលផ្តាច់ព្រ័ត្រ។
